محاوره جميله بين الشاعر سلطان الجلاوي والشاعر مصلح بن عياد تفضلوو

السلام عليكم ورحمة الله وبركاته

رجعت ومعي اجمل محاوره بين الشاعرين مصلح بن عياد والشاعر سلطان الجلاوي

هذه المحاوره بين الشاعرين مصلح بن عياد الشلوي وسلطان الجلاوي في حفل اللهوب في قصر ليلتي 24/7/1432ه واللعب على المعنى السياسي...

سلطن الجلاوي
تعال يالحارثي وأسمع كلامٍ صحيح
كلامٍ أحلى من السكر وهرجٍ مليح
الطب عيا يفيدك يالطبيب الجريح
والآرض يا كثر صاحيها ومجنونها

الحارثي لو عكف فاُم القرى*أخير وأبرك له من الملعبه
الجاري اللي على مصلح جرى*ما ينطحه لو فتل راس شنبه

مصلح بن عياد
الحارثي يعرف الصادق من المنحرف
اللي ليا شاف له فرصه يجي ويحذف
خلك على الهون قدامك مية منعطف
والآرض يا كثر صاحيها ومجنونها

الحارثي باع فيكم وأشترى*في كل جمعه يضحي برقبه
تنزل مع السيل وآلا مع كرى*مالك عن اللي يصيبك مجنبه

سلطان الجلاوي
من يظلم الناس يا مصلح ويقعد يغيب
هو ما درى أن الله الوالي تعالى رقيب
الظلم لا بد شمسه يا صحيبي تغيب
والآرض يا كثر صاحيها ومجنونها

ليلي وليلك على الماقف سرى*يا لاعب القاف غيرك يلعبه
رفيت غربك ولكن أنفرى*ما عاد تلقى صبوحٍ تشربه

مصلح بن عياد
الظلم ما هو بطبعٍ لي ولا هوب لي
حيل الله أقوى ما غير الله خصمٍ قوي
أنته خويي وأنا أقدر وأروف الخوي
والأرض يا كثر صاحيها ومجنونها

عين الأسد ما يغطيها الذرى*يحدى البعارين يم المقصبه
لو كان تحت الثرى عقرب ثرى*القصر دونه سلالم وعتبه

سلطان الجلاوي
يا كثر يا كثر ما سويت وسط البلد
حنا ترانا نعرفك زين يأبو فهد
أنته تقول أن ما غيرك من الناس أحد
والآرض يا كثر صاحيها ومجنونها

ألم ترى وأنت تقرى ألم ترى*أن الآمانات حاجه متعبه
ترى عتيبه ما ترجع للورى*أفطن وحدي حذارى تقربه

مصلح بن عياد
أنا ما سويت حاجه يا الجلاوي خطا
أعطيتكم من عطا ربي وأزيد العطا
وأعرف عيون الصقر وأعرف عيون القطا
والأرض يا كثر صاحيها ومحنونها

أسمك كتبته بوسط الدفترى*ومعلقٍ صورتك فالمكتبه
من خمّها عشق يتركها زرى*تصرخ عليه السيوف المذهبه

سلطان الجلاوي
محدٍ يبي لك فضل ليتك تكف الآذى
الناس ما هي ببلشانه بكسب الغذى
انته تخرب يا مصلح كل حاجه عذى
والآرض يا كثر صاحيها ومجنونها

ما ياقيٍ غير مردود البرى*أنته تحسب التطفل موهبه
الحارثي يمكن أنه مادرى*من طاول السقم وقته يذهبه

مصلح بن عياد
ماني بموذي مثل بعض العرب فالبلد
اللي قعد له ثلاث أجّبه وهو ما رقد
اللي يشيل العمد وآلا يحط العمد
والآرض يا كثر صاحيها ومجنونها

الخوف حاديك والحظ أقشرى*يا مصعب اللي تبي يا مصعبه
أحذر يخمك بليس الأعورى*وتحوص وآلا تحوص المركبه

سلطان الجلاوي
الضعف ما حطه الطيب سليلٍ له
يوم أن بعض العرب من جبنه وذله
ترجف عظامه ويجفل حتى من ظله
والآرض يا كثر صاحيها ومجنونها

هذي هقاوي مشاييخ وجبرى*والضعف يثني صحيبه بركبه
يا حارثي لو طرى لك ما طرى*أنا بموسي قطعت الحبحبه

مصلح بن عياد
الجبن ما هو لنا ياللي تقول الجبن
من عاش بالغبن لابده يموت بغبن
واللي ما يرضى بحكم الشرع ياكل تبن
والآرض يا كثر صاحيها ومجنونها

هبت عليكم هبوب الصرصرى*وأنتم تحطون فالنار خشبه
أليا لزمنا ظهور الضمرى*وجه نغيضه و وجهٍ نعجبه


مع تحياتي /زيدان لا تنسون الردود

ياسلااااااااااااااام عليك يازيدان والله أنك كفواا

أيه هذا الكلام السنع والمحاورات الحلوة

سلمت أناملك "" وصح الله لسان الشاعرين

مشكور يازيدان
محـاورة كتابية رااائعـة

تحياتي لك ....

مشكور أخي زيدان على المحاورة الجميلة
وصح الله لسان الشاعرين المبدعين ..